عايزه أختار بجد

السلام عليكم...ازيكم يا جماعة؟ أتمنى تكونوا كلكم بخير وكل سنة ثورة وانتم للنهضة مستعدين

أولاً أشكر كتير أوي اللي صمموا المنتدى ده والقائمين عليه أنا بنت كنت شاركت في الثورة، وبعدها بقيت حاسه ان فعلاً مصر بتاعتي وأنا مسؤولة عن بناءها ونهضتها من أول نجاح خطوتنا الأولى في الثورة، وعشان كده أنا لأول مرة إن شاء الله حنتخب في الانتخابات الجايه...بس طبعاً أنا عايزه أنتخب صح، وباختيار عقلاني ما بين بدائل المرشحين كلهم حسب برامجهم الانتخابية (وطبعاً بعد التأكد من ان ما كانش ليهم أي علاقة من قريب أو بعيد بالنظام البائد)، وعشان كده دورت على مرشحين دايرتي (باب شرق) على موقع اللجنة العليا للانتخابات بس ما لاقيتش أساميهم هناك، فدورت على جوجل كتير وأخيراً لقيت المنتدى ده، أنا بجد بشكركم أوي على المنتدى عشان لازم الناخبين يلاقوا فعلاً مكان يقدروا منه يعرفوا مرشحين دايرتهم وبرامجهم الانتخابية عشان يختاروا ما بينهم، لاني مش مستعده أستنى لحد يوم الانتخاب عشان أختار بسرعة واستعجال ما بين ورق الدعاية الأي كلام اللي بيتوزع يوميها في آخر لحظة

الانتخابات المرة دي بقيت انتخاباتنا بجد...وعشان كده لازم نهتم بيها كناخبين ونختار ما بين المرشحين بجد

أتمنى لو أي حد يقدر يوصلني لقائمة المرشحين كلهم (أفراد وقائمة) لدايرة باب شرق، عشان أبحث خياراتي كلها من غير ما يفوتني حد/حزب...

شكراً ليكوا تاني يا جماعة